Türkmenistan bilen Päkistanyň arasyndaky energiýa dialogy sebitleýin baglanyşyklary berkidýär

24-nji fewralda Yslamabat şäherinde Türkmenistanyň Ilçisi A. Möwlamow bilen Päkistanyň Federal Energetika ministri Sardar Awais Ahmad Han Legariniň arasynda duşuşyk geçirildi.

Duşuşykda elektrik energiýasy ulgamynda bar bolan bilelikdäki taslamalary öňe ilerletmek hem-de sebitara energiýa arabaglanyşygyny berkitmek boýunça hyzmatdaşlygyň mümkinçilikleri ara alnyp maslahatlaşyldy.

Taraplar infrastruktura taslamalarynyň amala aşyrylmagynyň we iki ýurduň arasynda durnukly energiýa üpjünçiliginiň ähmiýetini aýratyn belläp geçdiler. Şeýle hem, sebitleýin taslamalaryň çäginde energiýa howpsuzlygyny berkitmek we ykdysady ösüşe goldaw bermek ugrunda hyzmatdaşlygy giňeltmek mümkinçiliklerine seredildi.

Duşuşygyň ahyrynda taraplar taslamalary durmuşa geçirmek boýunça hyzmatdaşlygy dowam etdirmäge we tagallalary utgaşdyrmaga taýýardyklaryny nygtap, Türkmenistanyň we Päkistanyň arasyndaky hyzmatdaşlygyň strategik häsiýete eýedigini tassykladylar.