Yslamabatda türkmen-azerbaýjan gatnaşyklaryny mundan beýläk-de ösdürmegiň mümkinçilikleri ara alnyp maslahatlaşyldy

2026-njy ýylyň 11-nji sentýabrynda Türkmenistanyň Yslamabatdaky Ilçihanasynda Türkmenistanyň Päkistandaky Ilçisi A.Möwlamow bilen Azerbaýjan Respublikasynyň Päkistana täze bellenen Ilçisi Irfan Dawudowyň arasynda duşuşyk geçirildi.

Duşuşygyň başynda türkmen tarapy azerbaýjanly kärdeşini möhüm diplomatik wezipä bellenmegi bilen tüýs ýürekden gutlap, täze jogapkärçilikli işinde üstünlikleri, şeýle hem Azerbaýjan bilen Päkistanyň arasyndaky dostlukly gatnaşyklary mundan beýläk-de pugtalandyrmakda üstünlikleri arzuw etdi.

Duşuşyk türkmen-azerbaýjan gatnaşyklarynyň häzirki ýagdaýyny we geljekki ösüş mümkinçiliklerini ara alyp maslahatlaşmaga mümkinçilik berdi. Taraplar özara hormata we iki halkyň arasyndaky ýakyn doganlyk gatnaşyklaryna esaslanýan ikitaraplaýyn gatnaşyklaryň ýokary derejesini nygtadylar.

Türkmenistan bilen Azerbaýjanyň dost we doganlyk döwletler hökmünde özara gyzyklanma bildirilýän ugurlarda köpugurly hyzmatdaşlygy yzygiderli ösdürýändigi bellenildi. Özara ynamy has-da berkitmäge, amaly hyzmatdaşlygy giňeltmäge, şeýle hem iki ýurduň we halklaryň umumy bähbitlerine hem-de abadançylygyna hyzmat edýän başlangyçlary öňe ilerletmäge aýratyn üns berildi.

Duşuşygyň ahyrynda taraplar türkmen-azerbaýjan gatnaşyklarynyň binýadyny emele getirýän köpýyllyk dostluk ruhunyň bar bolan mümkinçilikleri iş ýüzünde durmuşa geçirmek we hyzmatdaşlygyň täze ugurlaryny açmak üçin mundan beýläk-de ygtybarly esas bolup hyzmat etjekdigine ynam bildirdiler.